Reshjet e dëborës kanë prekur edhe kryeqytetin, ndonëse me intensitet të dobët. Flokët e parë të dëborës në Tiranë kanë nisur rreth orës 02:00 të mëngjesit të sotëm dhe kanë zgjatur disa minuta duke krijuar edhe shtresën e parë të bardhë e cila nuk ka qëndruar gjatë. Bora është shkrirë pa zbardhur dita por gjithsesi ‘gjurmët’ e saj ishin prezente në disa zona të qytetit të Tiranës. Gjithashtu, reshje bore ka pasur edhe në Elbasan e Librazhd. Aktualisht për shkak të dëborës janë krijuar vështirësi në qarkullim edhe në rrugën kombëtare Elbasan-Librazhd-Prrenjas-Qafë-Thanë dhe në të gjitha akset rurale të Qarkut të Elbasanit.
Për herë të parë këtë vit, ky mëngjes ka gjetur të zbardhur edhe Shkodrën. Gjatë natës ka pasur reshje bore në qytet ku mësohet se trashësia ka arritur në 3-4 cm dhe për pastrimin e rrugëve është dashur ndërhyrja e borëpastrueseve. Si rrallë herë, edhe Gjirokastra është mbuluar nga bora. Raportohet se trashësia e borës në qytet arrin në mbi 10 cm, ndërsa në zonat rurale 30-40 cm. Problematike situata paraqitet në Dibër. Gjysma e fshatrave të këtij Qarku janë të bllokuar. Reshjet kanë sjellë edhe pezullimin e mësimit në Gjirokastër, Pukë, Mirditë, Fushë Arrëz si dhe në disa fshatra të Korçës. Ndërsa në zonat e tjera të prekura nga moti i keq, orët mësimore po zhvillohen të reduktuara.
Moti i keq në Korçë, ndërpritet mësimi në disa shkolla
Reshjet e dendura të dëborës të shoqëruara me temperatura të ulëta kanë sjellë ndërprerjen e mësimit në disa shkolla të qarkut të Korçës. Në Bashkinë Maliq, është ndërprerë mësimi në shkollën e Sheqerasit dhe Ormanit, në Bashkinë Korçë mesim nuk po zhvillohet në shkollën Floq-Pulahe, në Devoll në shkollën Vibohovë, Shuec, Dobranj dhe Zagradec nuk ka mësim. Në Ersekë në shkollat e fshatrave Boshanj, Mesickë, Butkë dhe Shals. Ndërsa në Pogradec, mësimi është ndëprerë në në zonën e Mokrës së Sipërme dhe të Poshtme. Në shkollat e tjera të Korçës mësimi po zhvillohet me orare të reduktuara.
Borë e dendur ka rënë edhe në Kukës, Pukë e Mirditë. Reshjet kanë sjellë edhe pezullimin e mësimit në Gjirokastër, Pukë dhe Mirditë, ndërsa në zonat e tjera të prekura nga moti i keq, orët mësimore po zhvillohen të reduktuara.