Nis seanca te Krimet e Renda ne ngarkim te Klement Balilit, i ashtuquajturi “Eskobari i Ballkanit”.
Ai eshte dukur i qete, teksa ka nisur seanca dhe eshte bere prezantimi i avokateve mbrojtes, Theodhori Sollaku dhe Baftjar Rusi.
Me pas, media eshte urdheruar te dale jashte salles, per te vijuar seanca me dyer te mbyllura.
Klement Balili ka dale ne mesdite nga paraburgimi i policise se Tiranes, drejt Gjykatës së Krimeve të Rënda, per t’u njohur me masen e sigurise.
Ne fotot e shkrepura nga LSA-ja, ai shfaqet i qeshur teksa shoqerohet nga forca te policise.
Ai do të njihet me akuzat si dhe do të bëhet një rivlerësim i masës së sigurisë, dhënë në mungesë më shumë se dy vite më parë. Paraditen e djeshme, në shortin e hedhur të Krimet e Rënda, gjyqtare e seancës paraprake u caktua Miliana Muça, ndërsa kjo e fundit do të bëjë edhe rivlerësimin e masës së sigurisë.
Hetimet për Balilin u mbyllën dhe paraditen e së martës, prokurori i çështjes Ened Nakuçi dorëzoi dosjen me 4 akuza në Gjykatë me kërkesë për të kaluar çështjen në gjykim dhe marrjen si të pandehur të shumëkërkuarin Klement Balili.
Ky i fundit u vetëdorëzua në Policinë e Shtetit, pikërisht gjatë momentit që dosja ishte dorëzuar në Gjykatë, ndërsa avokati Theodhori Sollaku, tha dy ditë më parë se i mbrojturi prej tij nuk i ishte larguar drejtësisë, pasi gjatë këtyre dy viteve drejtësia shqiptare nuk kishte bërë asnjë veprim që pengohej nga mosprania e Balilit. Ndërkohë, kujtojmë se hetimet ndaj tij kanë përfunduar në momentin që janë administruar të dhënat e reja nga autoritetet greke.
Gjatë seancës që pritet të zhvillohet sot, gjyqtarja Miliana Muça do të marrë në shqyrtim edhe provat e reja të Prokurorisë për këtë çështje, që janë dëshmitë e dy skafistëve që dyshohet se Balili ka kontaktuar si dhe disa përgjime.
Pas momentit të arrestimit, Klement Balili është vendosur në Drejtorinë e Policisë, ku gjatë ditës së djeshme ka pasur edhe një takim me familjarët e tij. Ndërkohë, pas verifikimit të masës së sigurisë, nëse mbetet në fuqi “Arresti në burg”, Balili do të transferohet në qelitë e paraburgimit në Tiranë.