Ministri i Brendshëm, Sandër Lleshaj ka zhvilluar një takim me drejtuesit e Policisë së Shtetit me fokus ndalimin e basteve sportive nga data 1 janar 2019.
Lleshaj tha se çdo aktivitet i kësaj natyre pas datës 1 janar do konsiderohet veprimtari e paligjshme e cila do sanksionohet sipas ligjeve në fuqi. Lleshaj paralajmëroi edhe drejtuesit e policisë nëse në zonat e monitorimit të tyre do konstatohen aktivitete të ushtrimit të basteve sportive.
“Nga ora 00:00 e 1 janarit ndalohen bastet sportive dhe garat e kësaj natyre. Nga data 1 janar kjo veprimtari bëhet e paligjshme në territorin e Republikës së Shqipërisë. Ndalimi i saj është detyrim për Policinë e Shteitt. Në cdo lokal ku ushtrohet në mënyrë të hapur apo të kamufluar, duhet të trajtohet si parcelë kanabisi dhe e gjithë qasja e policisë duhet të jetë e tillë nëse ka mbetur ndonjë në funksion. Drejtuesit e policisë do vihgen përpara përgjejgësisë nëse konstatohet veprimtari e paligjshme në territorin që ata do kenë në mbikëqyrje“, u shpreh Lleshaj.