“Nga një shërbim i degraduar, Urgjenca Kombëtare Mjekësore është shndërruar në një shërbim që garanton asistencën bazë në të gjithë territorin e Shqipërisë”, deklaroi sot Kryeministri Edi Rama.
Kryeministri Rama ishte sot i pranishëm në prezantimin e flotës së re të ambulancave, në Sheshin Nënë Tereza në Tiranë.
Duke theksuar faktin se sot Urgjenca Kombëtare është një sistem tërësisht autonom që funksionon i lidhur drejtpërdrejt me çdo qytetar në nevojë, Kryeministri solli në vëmendje “mikrorevoltën” që shpërtheu në sistemin tonë spitalor, kur u lajmërua reforma e urgjencës mjekësore. Ndërsa sot, tha ai, frytet e kësaj reforme janë të gjitha kuptimplota.
“Ne nuk kemi asnjë rrugë tjetër përveçse të mbështetemi tek faktet e punës sonë dhe të krijojmë me punën tonë, fakte të reja dhe kuptimplota. Se si ishte urgjenca mjekësore kjo është një histori që kërkon vështirësi të mëdha për tu pranuar, sepse të këqijat thonë se harrohen shpejt. Megjithatë sot ne me shumë krenari mund të themi se e shkuara është përgjithmonë e shkuar, edhe pse e ardhmja është ende larg për një urgjencë kombëtare mjekësore në lartësinë e sfidës dhe që t’i përgjigjet në kohë reale çdo familje dhe njeriu në nevojë në Republikën e Shqipërisë”, tha Rama.
Kryeministri theksoi se thelbi i reformës është fakti se “për të kërkuar urgjencën, nuk kalon më përmes spitalit”. “Nuk ka nevojë më t’i biesh telefonave që nuk përgjigjen dhe të presësh në pafundësi që të shfaqet urgjenca”, tha Rama.