Prefekti i Qarkut Dibër, Nexhbedin Shehu, organizoi një takim me drejtuesit e institucioneve kryesore të rretheve Dibër, Mat e Bulqizë si dhe zyrtarë të Policisë, SHISH-it dhe Prokurorisë. Kryefjala e Task-Forcës ishte kontrolli i plotë i territorit për të frenuar kultivimin e bimëve narkotike.
Prefekti Shehu tha se nga informacionet zyrtare rezulton se situata është nën kontroll të plotë nga strukturat shtetërore. “Deri me 15 qershor duhet të ushtroni kontrolle në të gjithë rajonin. Sejcili zyrtar duhet të kuptojë përgjegjësinë që ka për ndaljen e kultivimit të bimëve narkotike”, nënvizoi Shehu.
Drejtuesit e arsimit, SHISH-it, drejtorisë së kufirit, mjedisit, bujqësisë, zonave të mbrojtura, shërbimit social, Policisë Ushtarake, u shprehën se puna e tyre ka konsistuar në sensibilizimin e nxënësve të shkollave dhe qytetarëve për dëmet që shkaktojnë lëndët narkotike.
Mësohet se gjatë vitit të kaluar Policia e Dibrës ka ngritur 126 grupe kontrolli dhe janë ushtruar 1460 kontrolle në mjedise të mbyllura, shtëpi të braktisura, tunele, bunker si dhe parcela ku vite më parë dyshohet se janë kultivuar bimë narkotike. Kontrollet vijojnë edhe gjatë periudhës janar-maj 2019. Sipas Policisë gjatë këtij viti nuk është zbuluar asnjë bimë narkotike. /tirananews.al/