Policia e Vlorës ka arrestuar një 54-vjeçar, pasi në autostradën Fier-Vlorë u sekuestrua një armë zjarri që e posedonte një 17-vjeçar. Uniformat blu sqarojnë se kanë vënë në pranga drejtuesin e taksisë, në të cilën ishte pasagjer adoleshenti, ku edhe u gjet arma e zjarrit.
“Specialistët për Hetimin e Krimeve të Rënda, të DVP Vlorë, në vijim të veprimeve hetimore të kryera në kuadër të operacionit policor “The Passenger”, bazuar dhe në informacionet e siguruara nga inteligjenca policore, kapën dhe ndaluan shtetasin I. B., 54 vjeç, banues në Fier. Gjatë operacionit të zhvilluar 4 ditë më parë, në aksin rrugor “Fier – Vlorë”, në bagazhin e taksisë me drejtues shtetasin I. B. dhe pasagjer një 17-vjeçar, shërbimet e Policisë gjetën një armë zjarri automatike, që dyshohet se 17-vjeçari, i cili u arrestua në flagrancë, po e transportonte drejt Vlorës, me qëllim shitjen”, njofton policia.
Nga veprimet hetimore dyshohet se shoferi i taksisë është i përfshirë në këtë rast, pasi ka bashkëpunuar me 17-vjeçarin, për transportimin e armës së zjarrit, në këmbim të një shumë parash që do të merrte pas shitjes së saj. Po ashtu policia vijon punën për kapjen e shtetasit E. Gj., i shpallur në kërkim në kuadër të operacionit, dhe për dokumentimin e plotë të këtij rasti.