Tajvani i ka kërkuar Pekinit të ndalojë “veprimet provokative ” pasi 56 avionë luftarakë kinezë hynë të hënën në zonën e tij të mbrojtjes ajrore. Ky është sulmi më i madh i raportuar ndonjëherë nga forcat ajrore të Kinës.
Tajvani e quajti Pekinin “fajtorin kryesor” për tensionet e fundit mes dy palëve. Por Kina ka fajësuar Shtetet e Bashkuara për rritjen e tensioneve me Tajvanin. Kina e sheh Tajvanin si një provincë të shkëputur, por Tajvani e sheh veten si një shtet sovran.
Ishulli është ankuar për më shumë se një vit për forcat ajrore të Kinës që fluturojnë vazhdimisht aty pranë. Që nga e Premtja, Kina ka dërguar pothuajse 150 avionë në zonën mbrojtëse të Tajvanit.
Këshilli për Çështjet Kontinentale (MAC) akuzoi Pekinin se “dëmtoi seriozisht status quo-në e paqes dhe stabilitetit në Ngushticën e Tajvanit”.
“Ne kërkojmë që autoritetet e Pekinit të ndalojnë menjëherë veprimet e tij provokuese jo paqësore dhe të papërgjegjshme,” tha zëdhënësi i MAC, Chiu Chui-cheng në një deklaratë.
“Kina është fajtori për shkaktimin e tensioneve midis dy anëve të Ngushticës (Tajvanit) dhe ajo ka kërcënuar më tej sigurinë dhe rendin rajonal,” shtoi ai, duke thënë se Tajvani “kurrë nuk do të bëjë kompromis dhe nuk do t’i nënshtrohet” kërcënimeve.
Në reagimin e saj, Kina akuzoi Uashingtonin si provokatorë, ndërsa theksoi edhe njëherë se nuk e njeh pavarësinë e Tajvanit.
“Kina do të ndërmarrë të gjitha hapat e nevojshëm dhe do të shkatërrojë me forcë çdo komplot të pavarësisë së Tajvanit. Vendosmëria dhe vullneti i Kinës për të mbrojtur sovranitetin kombëtar dhe integritetin territorial është i palëkundur. SHBA duhet të ndalojë mbështetjen e forcave të Tajvanit”, tha ministria.
Pse ka tensione mes Kinës dhe Tajvanit?
Kina dhe Tajvani u ndanë gjatë një lufte civile në vitet 1940, por Pekini këmbëngul se ishulli do të rimerret, me forcë nëse është e nevojshme.
Si qeveriset Tajvani?
Ishulli ka kushtetutën e vet, udhëheqës të zgjedhur në mënyrë demokratike dhe rreth 300,000 trupa në forcat e tij të armatosura
Kush e njeh Tajvanin?
Vetëm disa vende e njohin Tajvanin. Shumica e njohin qeverinë kineze në Pekin. Shtetet e Bashkuara nuk kanë lidhje zyrtare me Tajvanin, por kanë një ligj që e kërkon që t’i sigurojë ishullit mjetet për të mbrojtur territorin e tyre.