Merkato e futbollistëve e kësaj vere dhuron lëvizje mjaft interesante dhe një nga skuadrat e cila duket më aktive që në ditët e para të saj është Totenhemi. Finalistët e Ligës së Kampioneve, pas thuajse dy vitesh pa transferime, janë vënë në lëvizje dhe sot kanë thyer zyrtarisht rekordin e klubit për transferimin më të shtrenjtë në histori.
Londinezët i kanë vnëë në dispozicion trajnerit Mauricio Poçetino mesfushorin që ai kërkonte prej kohësh, Tangui Ndombele, duke fituar përballë skuadrave si Mançester Junajtid, Juventus e Real Madrid që ishin interesuar gjithashtu konkretisht për futbollistin e Lionin. Klubi francez nga ana e tij as nuk kishte ndër mend të ultë pretendimet financiare që kishin “frikësuar” klubet e tjera dhe për këtë arsye, Totëenhem iu desh që të paguante një shifër të majme për 22-vjeçarin.
Pas vizitave mjekësore, Ndombele nënshkroi kontratën e tij, ndërsa londienzët bënë gati çekun për klubin francez i cili bëri publike shifrat e marrëveshjes. Olimpik Lion bëri të ditur se Totenhem do të paguante 60 milionë euro, ndërsa 10 milionë euro të tjera do të ishin bonuse në bazë të paraqitjeve personale apo me skuadrën. Ky ishte rekordi i ri i transferimeve për Totenhem, i cili me sa duket ka rifilluar të jetë aktiv në merkato pas thuajse dy viteve pushime ku të gjitha fondet shkonin për rindërtimin e stadiumit.