Hajdutët bëjnë kërdinë sidomos në kohën e pushimeve. Ndaj, Policia publikon një paketë me këshilla për të gjithë qytetarët shqiptarë. Sipas saj, kur të dilni nga shtëpia apo nga puna, sigurohuni që të gjitha dyert e dritaret të jenë të mbyllura. Nëse do të largoheni për një kohë të gjatë, kërkojini një fqinji që herë pas here të shikojë shtëpinë tuaj dhe nëse vëren ndonjë veprim të dyshimtë të telefonojë policinë.
Por këto kohë janë vjedhur edhe shumë makina, ndaj Policia sugjeron që “kur e lini makinën diku, sigurohuni të keni mbyllur dyert dhe nuk keni lënë asnjë gjë me vlerë në makinë, i merrni sendet me vete ose mbyllini në bagazhin e makinës”. Gjithashtu, Policia thotë se nëse makina ka sistem alarmi, aktivizojeni atë. Në mbrëmje ose natën përpiquni të parkoni në një vend me dritë.
Por, droga është një tjetër këshillë e madhe e Policisë. “Mos pranoni që të bëni provë përdorimin e drogës, pasi kjo mund të jetë fatale për ju. Shoqërohuni me shokë që nuk përdorin drogë. Merruni sa më tepër me veprimtari kulturore, sportive, studimore. Nëse e keni filluar përpiquni ta lini atë. Kërkoni ndihmën e të afërmve tuaj dhe drejtohuni tek mjekët specialist”.
Për Policinë, një problem më vete është edhe rruga. Sipas saj, kur ecni në vende që nuk i njihni, shikoni përreth për të parë nëse ka rrezik. Sigurohuni që çanta, apo gjëra të tjera me vlerë janë të siguruara dhe nuk mund t’ua marrin me lehtësi keqbërës, që mund t’ju kenë zënë pritë.