Viti 2017 ka shënuar një rënie të numrit të qytetarëve të huaj që kanë përfituar nënshtetësinë në një vend anëtar të BE-së. Janë rreth 825 mijë të qytetarë me origjinë nga vende jashtë Bashkimit Europian që kanë marrë nënshtetësinë e tij.
Vendi me numrin më të madh të nënshtetësive të dhëna është Italia me 18% të gjithë totalit të BE-së, ndërsa pas saj vijnë Britania e Madhe me 15%, Gjermania dhe Franca me nga 14% secila, Suedia dhe Spanja me nga 8%. Përfituesit kryesorë janë marokenët (8%), shqiptarët (7%), indianët dhe turqit (4% secili grup).
Sipas të dhënave të Eurostatit, Franca, Spanja dhe Italia janë shtetet që kanë dhënë më shumë nënshtetësi për marokenët, Italia dhe Greqia (97% së bashku) për shqiptarët, Britania e Madhe për indianët dhe Gjermania për turqit.
Numri i nënshtetësive të dhëna për të huajt që jetojnë në një vend të BE-së është rritur në periudhën 2008-2017. Nga rreth 800 000 në periudhën 2008-2012, ky numër u rrit në 980 000 në vitin 2013. Pas një rënieje në vitet 2014-2015, tendenca shënoi rritje në vitin 2016, kur shkoi në 995 000 nënshtetësi.
