Ka qenë kritik Prefekti Nexhbedin Shehu me institucionet që ushtrojnë aktivitetin e tyre në Qarkun e Dibrës. Ai ka konstatuar se koordinimi mes tyre mbart probleme dhe se ende ka qytetarë që punojnë pa qenë të siguruar.
Gjatë një takimi me drejtorët e inspektoriatit të punës, tatim-taksave, sigurimeve shoqërore, zyrave të punës dhe kujdesit social, u tha se subjektet e ndërtimit, të minierave dhe ato që kanë më shumë se pesë punonjës janë më korrekt me regjistrimin e punonjësve, ndërkohë që ka ende subjekte të biznesit të vogël që nuk i sigurojnë punonjësit, madje as nuk i trajtojnë siç duhet.
Prefekti i Dibrës nënvizoi se institucionet duhet të rrisin bashkëpunimin mes tyre dhe të jenë në anën e qytetarëve që megjithëse punojnë në punë të vështira ata nuk janë të regjistruar, pra punojnë në të zezë. Shehu tha se inspektoriati i Punës, Tatimet dhe Sigurimet duhet të ushtrojnë kontrolle konkrete në subjektet që dyshohen se kanë të punësuar në të zezë. Po ashtu u kërkua një bashkëpunim më i mirë më pushtetin lokal. /tirananews.al/