Ish kryeminsitri Aleksandër Meksi dhe një sërë ish-zyrtarësh të lartë të qeverisjes së Partisë Demokratike kanë fituar gjyqin kundër qeverisë, duke arritur të shfuqizojnë nenin 23 të VKM nr. 231 datë 21.03.2017, i cil përcakton se për objektet në kompetencë të Këshillit Kombëtar të Territorit distancat mes objekteve mund të përcaktohen nga KKT me rregullore të posaçme.
Pikërisht për shkak të kësaj beteje ligjore është bërë leja zhvillimore dhe rregullorja e veçantë e miratuar nga KKT në favor të subjektit “Invest Society” për ndërtimin e një godine që do të shkonte deri në 9 kate, në rrugën “Ibrahim Rrugova”, pas godinës së Presidencës, e cila është bërë shpesh objekti i akuzave publike.
KKT mori vendimin në qershor të vitit të shkuar për të lejuar këtë kompani të bëjë ndërtimin, por ky vendim u përball me padinë e bërë nga Aleksandër Meksi, Manushaqe dhe Elsa Zhulali (familjar të Safet Zhulalit), Joana Topalli (familjare e ish këshilltarit të Berishës Kolec Topallit), Fatbardh dhe Fatmire Metaj, Suzana Arbnori, Gjystina dhe Filip Arbnori, (familjarë të Pjetër Arbnorit), Rexhep Uka, Bardh Spahia dhe Shaqir Vukaj. Këta janë banorë të ty pallateve ekzistuese ngjitur me Presidencën dhe pronarë të truallit përkatës.
Ata kanë kundërshtuar pasi largësia mes pallatit të tyre dhe atij shumëkatësh që do të ngrihet nuk është respektuar dhe se subjekti ndërtues është afruar me një distancë që bie ndesh me formulën që përcakton ligji dhe VKM-ja.