Dy të burgosur shqiptarë të moshës 31 dhe 33 vjeç janë arratisur nga burgu i Kasandras në Haldiki të Greqisë. Të dy shqiptarët ishin dënuar me burgim të përjetshëm, njëri për vrasje të mbetur në tentativë dhe tjetri për vrasje të qëllimshme.
Autoritetet greke janë vënë në kërkim të tyre. Siç raportojnë mediat vendase, mungesa e tyre nga autoritetet e burgut u konstatua mëngjesin e të martës, kur dy shqiptarët munguan në apelin e mëngjesit.
Administrimi i burgjeve njoftoi autoritetet policore në të njëjtën ditë për t’u vënë në kërkim të tyre. Policia ka nisur kërkimet prej të martës, ndërsa janë njoftuar doganat, aeroportetet etj për të parandaluar daljen e tyre jashtë shtetit grek.