Vetingu ka shkarkuar mjaft gjyqtarë e prokurorë që nga nisja e punës së tij një vit më parë, dhe pothuajse të gjithë shkak të shkarkimit kanë pasur pasurinë e pajustifikuar. Dhe pse është e parashikuar në ligj për herë të parë ndodh që KPK të marrë masë ndaj një subjekti të vetigunt për aftësi profesionale.
Ky është rasti i kreut të Prokurorisë së Shkodrës, Elvin Gokaj, për të cilin u dha vendimi i pezullimit për një vit nga puna me kusht që gjatë këtij viti të ndjekë Shkollën e Magjistraturës.
Pezullimi për një vit, shoqëruar me edukimin e detyrueshëm është një ndër masat disiplinore të parashikuara në Kushtetutë për mangësitë profesionale, megjithatë ajo aplikohet për herë të parë nga KPK.
Sipas BIRN, Elvin Gokaj e ka nisur karrierën në sistemin e drejtësisë si oficer i policisë gjyqësore. Në vitin 2000 ai është emëruar prokuror në Prokurorinë e Matit, ndërsa në vitet 2007-2013 ka kryer detyrën e drejtuesit të Prokurorisë së Elbasanit. Gokaj është promovuar në Prokurorinë e Apelit të Shkodrës në vitin 2014 dhe prej vitit 2016 ushtron funksionin e drejtuesit të kësaj prokurorie.
Procesi i vetingut për prokurorin Elvin Gokaj u krye nga trupa gjykuese e kryesuar nga Xhensila Pine, me relatore Genta Tafa Bungon dhe anëtare Pamela Qirkon. Gjatë seancës dëgjimore, KPK konstatoi probleme në shumicën e dosjeve të hetuara nga subjekti dhe që u bënë pjesë e rivlerësimit.
Sipas relatores Bungo, në 3 raste “duket se subjekti s’ka analizuar si duhet masën e dënimit; në dy rase s’ka analizë të veprës penale; në 1 rast në cilësinë e drejtuesit s’ka dhënë argumentim për zëvendësimin e prokurorit të një çështjeje dhe në një rast duket se ka shkelur të drejtat e të pandehurit duke zëvendësuar avokatin e zgjedhur prej tij me një avokat kryesisht”.
Përveç dosjeve të analizuara, relatorja shtoi se në KPK ishte depozituar një denoncim ndaj prokurorit Gokaj, i cili pretendonte se gjatë periudhës kur subjekti drejtonte prokurorinë e Elbasanit “ka ndikuar te prokurorët për caktimin e masave të buta të sigurisë për të dhënë dënime të ulëta”.
KPK konstatoi gjithashtu si problem mungesën e pasqyrimit të kontaktit të tij me një shtetas me inicialet E.N, i akuzuar për shpërdorim detyre dhe pastrim të produkteve penale. Prokurori Elvin Gokaj i kundërshtoi denoncimet si të pavërteta dhe që kishin për synim diskretitimin e tij, ndërsa lidhur me marrëdhënien me shtetasin E.N deklaroi se nuk ishte në dijeni se ndaj tij kishin nisur hetime.