Emnori dhe Pavlina kurorëzuan dashurinë e tyre 50 vite më parë, kur ai ishte oficer i marinës në ishullin e Sazanit.
Në atë kohë ishulli ishte i banuar me marinarë dhe familjet e tyre, dhe një pjesë të mirë të jetës ata e kaluan aty. Deri para pak vitesh ishulli i Sazanit ishte i paprekur, ashtu siç ishte lënë në vitet e komunizmit me ndërtesat e kohës. Sot është kthyer në një atraksion turistik dhe falë kësaj nisme Emnori dhe Pavlina morën dhuratën më të bukur për 50-vjetorin e martesës së tyre.
Forcat e Armatosura i kanë bërë një surprizë Emnorit. E ku ka më bukur se të festosh në vendin ku lindi, u rrit dhe jetoi gjatë dashuria e tyre. Ministrja e Mbrojtjes Olta Xhaçka ka ndarë historinë e bukur në faqen e saj në Facebook.
“Ishulli i Sazanit ka një rëndësi të veçantë për çiftin Shtylla. Emnori, ish-oficeri i marinës dhe bashkëshortja e tij Pavlina kanë punuar dhe celebruar dashurinë e tyre ❤ në këtë ishull. Gjysmë shekulli më pas i mundësuam të rikthehen aty për të festuar 50-vjetorin e martesës. Mirënjohje çdo burri e gruaje që kanë shërbyer e shërbejnë në FA!”, shkruan Xhaçka.
Si duket koha ka ecur dhe bashkë me të është shtuar edhe dashuria për njëri-tjetrin.
