Dhjetra banorë të fshatrave Gjoçaj e Zallë Gjoçaj në njësinë administrative Derjan, bashkia Mat, kanë protestuar sot në mesditë në fshatin Lami i Madh, aty ku vijojnë punimet për ndërtimin e HEC-it Zajz-Zallë Gjoçaj. Banorë autokton dhe të ardhur nga Tirana kundërshtojnë ndërtimin e kësaj vepre energjitike. Kryetari i fshatit Gjoçaj dhe ambjentalisti Sazan Guri u shprehën në protestë se kalimi i ujit të lumit Flim në lumin Urakë shkakton probleme për banorët dhe blektorinë e zonës së Derjanit. Ata kërkuan pezullimin e punimeve në tunelin që ka avancuar 200 ml nga Zajsi në drejtim të fshatit Melth. Policia lokale kishte marrë masa për mbarëvajtjen e protestës që ishte paralajmëruar e qetë, por banorët fillimisht shkatërruan tabelën e punimeve dhe u shprehën se do të dëmtonin dhe makineritë e firmës konçesionare. Banorët janë ankuar prej kohësh dhe kanë kërkuar pezullimin e punimeve, por vetëm dy javë më parë ish-zyrtarët e bashkisë Mat njoftuan me shkrim banorët e fshatit Gjoçaj se ishin dakordësuar për ndërtimin e objektit dhe kishin arkëtuar taksën përkatëse në llogarinë e bashkisë. Banorët deklaruan se protestat do të vazhdojnë. /tirananews.al/
Add A Comment