Agron Malaj, kryetar i bashkisë Mat deklaroi sot se në ndërmarrjen e rrugëve janë konstatuar abuzime të mëdha dhe se shkaktarët do të vihen para ligjit. Sipas kryebashkiakut drejtues dhe punonjës të bashkisë kanë përdorur mjetet dhe fondet për nëvojat e tyre dhe jo të komunitetit.
“Abuzime serioze janë bërë nga ish drejtuesit e Bashkisë Mat. Makineritë janë përdorur për punë private. Janë shpenzuar miliona lekë dhe mjetet janë në gjendje kritike. Pas shumë viteve i kemi grumbulluar pranë godinës së ndërmarrjes. Disa ishin në inventar dhe të tjera ishin si mall pa zot. Është për të ardhur keq si është katandisur ndërmarrja e rrugëve për vite me radhë. Ajo u ka shërbyer vetëm disa personave, zyrtarë dhe punonjës të pushtetit lokal. Mjetet ishin dislokuar pranë banesave të punonjësve dhe zyrtarëve të bashkisë. Edhe mjeti i dhuruar nga Qeveria është katandisur si mos më keq. Rrugët e fshatrave të Matit ndodhen në gjendje kritike. Ne do të kërkojnë zbardhjen e gjendjes dhe proçedimin penal të abuzuesve me fondet dhe mjetet e bashkisë”, u shpreh Malaj.
Ai shtoi se pas riparimit të mjeteve do të ndërhyhet për ndryshimin e gjendjes në rrugët rurale të Matit. /tirananews.al/