Një grup eksploruesish ujërash kanë arritur të filmojnë me kamera me cilësi të lartë anijen e Titanikut rreth 3800 metra në thellësinë e ujërave të Oqeanit Atlantik dhe që po shpërbëhet gjithnjë e më shumë.
Grupi i zhytësve ekspertë nuk bën vetëm foto të anijes që u mbyt 107 vite më parë, por edhe një skanim të anijes për të krijuar modelin 3D. Kjo është hera e parë që anija fotografohet në këtë mënyrë në 14 vjet.
Anija Titanikut u mbyt në 1912, pas përplasjes me një ajbserg në veri të Oqeanit Atlantik. Më shumë se 1500 persona humbën jetën në një nga katastrofat ujore më të rënda në histori dhe që do të mbahet mend gjatë.
Për herë të parë mbetjet e Titanikut u zbuluan në 1985, më shumë se 70 vite pas tragjedisë, gjatë një misioni ushtarak amerikan. Anija u nda më dysh dhe gradualisht po shërbëhet në thellësinë 3800 metra të detit. Në pamjet e reja mahnitëse dallohet qartë që është bërë ushqim për bakteret.
E mbijetuara e fundit e anijes, Millniva Dean, e cila ishte vetëm dy muajshe kur ndodhi tragjedia, ndërroi jetë dhjetë vite më parë, më 31 maj 2009, në moshën 97-vjeçare.