“Nëse për lojtarët afrikanë tek ekipet e tjera kushton byreku, këtu tek ne kushton pilafi dhe tasqebapi”- ka thënë Alban Rexha.
Në kompleksin “Internacional Tirana”, në Pezë, stërvitet prej kohësh një ekip me të rinjë afrikanë të cilët kanë ardhur në Shqipëri për t’i mbijetuar urisë. Ata nuk janë futbollistë profesionistë, por djem të zakonshëm që janë marrë nga kafenja apo kalçeto dhe janë përshtatur në krijimin e një ekipi stërvitor.
Ish-sulmuesi i Partizanit, Alban Rexha, luan rolin e menaxherit dhe trajnuesit për këta të rinjë, së bashku me Joshua King Dada.
Rexha thotë se synimi kryesor i krijimit të këtij ekipi është gjetja e një vendi pune si futbollist për afrikanët, aq sa për të fituar bukën e gojës.
Një situatë e tillë me lojtarë afrikanë është mjaft e përhapur në vendin tonë, aq sa këta të fundit luajnë edhe në kategorinë e dytë të kampionatit shqiptar.