Shtyhet me 30 ditë afati i mbylljes së transmetimeve analoge dhe kalimi në dixhital. Ka qenë ky vendimi i Bordit drejtues të Autoritetit të Mediave Audiovizive (AMA) nisur nga situata aktuale e pajisjes me dekodera të popullatës.
Por krahas kësaj, AMA i kërkon qeverisë ngritjen e menjëhershme të Komitetit Ndërinstitucional të punës për ndjekjen e procesit të digjitalizimit, i cili nuk është funksional që prej shtatorit 2017. Gjithashtu ky institucion i bën thirrje qytetarëve të pajisen me dekodera.
AMA vëren se operatorët ekonomik
në treg, kryesisht platformat audiovizive të cilët tregtojnë dekodera, nuk kanë
vënë në dispozicion të saj informacionin e kërkuar në mënyrë të përsëritur,
lidhur me sasinë e dekoderëve që disponon.
NJOFTIMI I PLOTE
Bordi drejtues i Autoritetit të Mediave Audiovizive u mblodh sot, me datë 29.08.2019 dhe trajtoi si një ndër çështjet kryesore ecurinë e procesit të Digjitalizimit në qarqet Tiranë, Durrës, Vlorë.
Në kuadër të vlerësimit dhe analizimit të situatës në lidhje me informimin e qytetarëve për procesin e digjitalizimit si dhe pajisjen e tyre me dekodera, AMA ka kryer sondazhe periodike me një kampion prej 1600 të intervistuarish. Nga sondazhet e kryera ka rezultuar se një numër i konsiderueshëm qytetarësh shohin vetëm transmetime analoge.
AMA gjithashtu ka kërkuar informacion nga operatorët ekonomikë në treg lidhur me sasinë e dekoderëve që disponojnë. Ky informacion nuk është vënë në dispozicion nga disa operatorë, kryesisht platformat audiovizive të cilat tregtojnë dekodera. Gjithashtu, informacion i është kërkuar edhe Drejtorisë së Përgjithshme të Doganave lidhur me sasinë e dekoderëve të importuar në vendin tonë, por informacioni i përcjellë nuk konsiderohet i plotë edhe nga vetë ky autoritet.
Në mungesë të këtyre informacioneve, AMA nuk mund të identifikojë sasinë e dekoderëve të disponueshëm në treg me qëllim plotësimin e nevojave të popullsisë e cila ende nuk është pajisur me dekoder.
Duke pasur parasysh rëndësinë e
këtij procesi, përcaktimet në Strategjinë për Kalimet në Transmetime Numerike,
sipas të cilës transmetimet analoge në një zonë të caktuar mbyllen pasi e
gjithë popullsia (ose pjesa më e madhe e saj të jetë pajisur me marrës
numerikë), dhe referuar rekomandimeve të lëna nga Kuvendi i Republikës së
Shqipërisë, si dhe duke vlerësuar faktin që në qarqet Tiranë, Durrës dhe Vlorë,
banon gjysma e popullsisë së vendit dhe impakti i këtij procesi është i
ndjeshëm tek shumë qytetarë, Bordi i AMA-s unanimisht vendosi:
1- Shtyrjen e afatit të mbylljes së transmetimeve analoge në qarqet Tiranë,
Durrës dhe Vlorë me 30 ditë.
2- Operatorët ekonomike në treg, kryesisht platformat audiovizive të cilët
tregtojnë dekodera, të vënë në dispozicion të AMA-s informacionin e kërkuar në
mënyrë të përsëritur, lidhur me sasinë e dekoderëve që disponojnë.
3- Operatorët privatë kombëtarë të cilët ende nuk mbulojnë me sinjal numerik
zonat urbane (Bashkitë Sarandë, Himarë), të marrin masa të menjëhershme për
shtrimin e infrastrukturës digjitale edhe në këto zona.
4- T’i drejtohet qeverisë me kërkesën për ngritjen e menjëhershme të Komitetit
Ndërinstitucional të punës për ndjekjen e procesit të digjitalizimit, i cili
nuk është funksional që prej shtatorit 2017.
Bordi i AMA-s vlerësoi se shtyrja e afatit me 4 javë nga njëra anë do t’u krijojë mundësi qytetarëve të marrin masat e nevojshme në mënyrë që të përfitojnë shërbimin audioviziv dhe nga ana tjetër operatorëve u jepet mundësia të realizojnë një shërbim më të mirë ndaj qytetarëve.
AMA kërkon mirëkuptimin e qytetarëve tashmë të pajisur me dekodera si dhe të operatorëve audiovizivë të cilët kanë përfunduar implementimin e infrastrukturës digjitale dhe kanë dalë me oferta për qytetarët, dhe në veçanti Operatorit Publik Shqiptar, lidhur me këtë vendim.
Së fundmi, i bëjmë thirrje qytetarëve të pajisen me dekodera në mënyrë që të përfitojnë shërbimet audiovizive digjitale.