Renditja e Kategorisë Superiore pas tre javëve të para të saj, sheh se nuk ka më asnjë skuadër e cila ka pikë të plota në këtë moment të sezonit. Tani janë tre skuadra të cilat janë ngjeshur në vendin parë, si dhe dy të tjera që i ndjekin me një pikë më pak, që do të thotë se për këtë fillim edicioni ka “luftë” për çdo pikë dhe asgjë nuk duket e sigurt.
Kreu tashmë ndahet nga Tirana, Kukësi dhe Teuta të cilët janë në kuotën e 7 pikëve dhe vetëm golavarazhi mban bardheblutë në vendin e parë. Pas tyre janë Partizani dhe Skënderbeu, me të kuqtë që shkuan në 6 pikë pas suksesit të sotëm, ndërsa Skënderbeu ngeci në shtëpi përballë Bylisit.
Ballshiotët dhe Vllaznia janë në mesin e qetë për momentin me nga 4 pikë secili, ndërsa Laçi mori pikën e parë, por mbetet larg pretendimeve që ka për Europën apo titullin. Kurse në fund, pavarësisht sinjaleve pozitive, mbeten pa pikë Flamurtari dhe Luftëtari që janë më të rrezikuarat për rënien.