Ministrja për Marrëdhëniet me Parlamentin, njëherësh dhe zëdhënësja e qeverisë, Elisa Spiropali, ka bërë një deklaratë të fortë, ndërsa tha se Presidenti Meta ka qenë pjesë e një skenari për destabilizimin e Shqipërisë.
E ftuar në rubrikën “Opinion”, në Neës 24, Spiropali tha se Meta ka shkelur Kushtetutën dhe se nuk ka përfaqësuar në asnjë çast interesin e popullit.
E pyetur nëse ka mazhoranca një emër të ri për zëvendësimin e Metës, pas nisjes së procedurave për shkarkimin e tij, Spiropali u shpreh se si fillim do të bëhet hetimi përkatës në Komisionin Hetimor Parlamentar.
“Ne nuk rendim për të shkelur afatet, nuk e kemi diskutuar emrin e ri, nuk jemi në atë fazë. Aktualisht është ngritur komisioni për hetimin e dekreteve të Presidentit, do vazhdojë procesi i hetimit dhe Parlamenti do votojë. Pastaj, i takon Gjykatës Kushtetuese të vendosë, por për ne është shumë e qartë se Meta e ka shkelur Kushtetutën me të dyja këmbët dhe ka qenë pjesë e një skenari për të destabilizuar Shqipërinë. Nuk ka përfaqësuar interesin e popullit në asnjë çast”, ka deklaruar Spiropali.