Policia gjermane ka zbuluar një skemë mashtrimi të dy shqiptarëve të Kosovës, babë e bir, të cilët falsifikonin dokumente me martesa fiktive për të “ndihmuar” qytetarë jashtë BE-së të rregullonin qëndrimin në Gjermani.
Albinfo.ch shkruan se Mehmet G., 58 vjeç dhe i biri i tij, Visari (34) të dy kosovarë bashkë me një grua me emrin Nadia (42 vjeçe), kishin nisur nga fundi i vitit 2016 deri në fillim të vitit 2018 të “ndihmojnë” qytetarë jashtë BE-së për të rregulluar qëndrimin në Gjermani.
Për këtë qëllim ata kishin përdorur “marifetin” e njëjtë: Gra nga Rumania dhe Bullgaria, të interesuara për martesë, dhe kryesisht i martonin me kosovarë, të panjohur për to. Martesa kryesisht bëhej në Kosovë ose në Danimarkë.
Po ashtu, banda i pajiste gratë në fjalë me kontrata të falsifikuara të qirasë dhe të punës si dhe i shoqëronte të posamartuarit në takimet e domosdoshme të tyre me autoritetet shtetërore. Në momentin kur burrat nga Kosova i kishin në duar letrat e nevojshme për qëndrim të paktën 5 vjeçar në Gjermani, zonjat ktheheshin në vendin e tyre. Ndërkohë, nëse të akuzuar pranojë akuzat, atëherë 58-vjeçari mund të dënohet me 3 vite burg, djali me 1 vit e gjysmë, ndërsa gruaja mund të shpëtojë në liri me kusht.
Mehmeti do të dënohet me rreth tri vite e gjysmë burg, Visari me 2 vjet e gjysmë ndërsa Nadia, mund të shpëtojë me burg me kusht. Mësohet se shuma që merrte Mehmet G., për çdo martesë ishte mbi 10.000 euro.