Punohet me ritme të larta në të gjithë gjatësinë e Rrugës së Arbërit. Banorëve të Matit e Dibrës u ka tërhequr vëmendjen Ura e Vashës, ndërtimi i të cilës është në metrat e fundit. Ura B4, ndryshe Ura e Vashës, ndodhet mbi Lumin Mat dhe gjatësia e saj është 398 ml.
Specialistët saktësojnë kjo urë po realizohet si ramë rigjide me mbistrukturë tip konsol/kantilever. Në planin horizontal përsëri kemi një urë të kurbëzuar, gjë që kushtëzon projektim të kujdesshëm dhe masa shtesë ankorimi të këmbeve/pilave kryesore.
Mbistruktura këtu është në formë boxi me përmasa lartësi 8 m në mbështetje dhe 3 m në mes të hapësirës. Ura mbahet nga tre këmbë/pila dhe dy ballna. Këmbët janë 27, 62 dhe 70 m të larta. Struktura e tyre është box me përmasa 6 x 6m, që kanë një kapje rigjide me mbistrukturën, si dhe një inkastrim të plotë në shkëmbinj masiv të bazamentit. Ballnat do të përfaqësojnë struktura masive beton-armeje. Kuota në hyrje është 444.96 m mbi nivelin e detit. /tirananews.al/
