“Lëndim të rëndë trupor” e ka cilësuar Prokuroria e Prizrenit veprimin e Ilir Haxhijaj nga fshati Nepërbisht i Suharekës, i cili akuzohet për vdekjen e bashkëshortes së tij, H.D nga Rahoveci.
Haxhijaj pas një mosmarrëveshje me bashkëshorten e tij, tashmë të ndjerën H.D ka ndaluar makinën dhe me forcë e ka nxjerrë jashtë dhe ka filluar ta sulmojë fizikisht duke e goditur me grushta në të gjitha pjesët e trupit.
“Kur viktima është rrëzuar në asfalt, sipas prokurorisë, i dyshuari i kapërplasur kokën dhe disa herë në asfalt, për rrjedhojë i ka shkaktuar dëmtime serioze në kokë, gjoks, shpinë e duar. Për shkak të plagëve H.D vdes në QKUK, në Prishtinë”, thuhet në aktakuzë.
Familja e viktimës ka angazhuar avokat sipas të cilit vlerësimi si lëndim trupor e jo si vrasje është i pakuptimtë. Avokatja e të akuzuarit Nadire Hoxha përmes një përgjigje me shkrim ka thënë se përveç aktakuzës nuk ka pranuar asnjë provë materiale për ketë rast.
“Unë jam avokate e caktuar sipas detyrës zyrtare. Lidhur me këtë çështje penale dhe tani për tani unë kam pranuar vetëm aktakuzën dhe asnjë prove materiale lidhur me këtë rast kështu që çdo deklarim i imi në ketë fazë të procedurës është i ngutshëm lidhur me këtë Aktakuze”, ka thënë Hoxha.