Izet Haxhia mbetet në burg, dhe ky ka qenë dhe vendimi i Gjykatës së Apelit të Tiranës, e cila ka rrëzuar kërkesën e tij.
Haxhia pretendonte se duhej liruar pasi ka tejkaluar afatet e paraburgimit, duke llogaritur këtu dhe burgun në Turqi.
Por Apeli ka lënë në fuqi vendimin e shkallës së parë të dhënë më 26 korrik për ish truprojën e Sali Berishës.
Haxhia akuzohet për vrasjen për shkak të cilësisë së viktimës dhe në kushtet kur Azem Hajdari në momentin e vrasjes ishte deputet, çështja zgjidhet në Gjykatën për Krime të Rënda.
Izet Haxhia ishte gjykuar dhe dënuar në mungesë me 25 vite burg si bashkëpunëtor në vrasjen e Azem Hajdarit. Ai u arrestua në Turqi në vitin 2006 dhe u ekstradua në Shqipëri më 8 maj të 2018 ku kërkoi rigjykim të çështjes, gjë që u pranua. Në listën e dëshmitarëve Izet Haxhia kërkon edhe dëshminë e ish-presidentit dhe ish-kryeministrit Sali Berisha.