Të gjithë personat që kanë ndërtuar pa leje duhet të paguajnë taksën e ndikimit në infrastrukturë për ndërtimet e tyre. Pagesa ose jo e taksës nuk ndikon në procesin e kualifikimit të ndërtimit për legalizimin. Kjo do të thotë që dosja shqyrtohet nga ALUIZNI pavarësisht faktit nëse është shlyer kjo taksë ose jo. Por pagesa e taksës së ndikimit në ifrastrukturë është e domosdoshme në etapën tjetër, gjatë procesit të pajisjes së personit që ka ndërtuar pa leje me tapi të rregullt.
Sipas legjislacionit përkatës, dokumentacioni i pronësisë së parcelës ndërtimore ose i ndërtimit ekzistues, për shtesat pa leje, administrohet përpara miratimit të lejes së legalizimit vetëm nëse subjekti e disponon atë. Mungesa e këtij dokumentacioni nuk pengon miratimin e lejes së legalizimit. Në ligjin për legalizimet thuhet se dhënia e lejes së legalizimit nga zyra përkatëse e ALUIZNI-t, me plotësimin e të gjithë dokumentacionit të përcaktuar në nenin 27 të ligjit për legalizimet, bëhet brenda 30 ditëve nga paraqitja e kërkesës. Kështu, ALUIZNI pajis subjektin me lejen e legalizimit, por hipotekimi i tij varet nga pagesa e taksës së ndikimit në infrastrukturë.