Presidenti iranian Hasan Rouhani i bëri thirrje Perëndimit të mos nxisë një tjetër luftë në Lindjen e Mesme. Në përvjetorin e 39-të të nisjes së luftës Iran-Irak, Rohani bëri përgjegjëse fuqitë e huaja si shkaktare të katastrofave në rajon në të kaluarën, ndaj u kërkoi të qëndrojnë larg rajonit.
“Nëse janë të sinqertë, ata nuk duhet t’a bëjnë rajonin tonë arenë të garës së armatimit. Sa më lart të qëndroni nga rajoni dhe kombet tona, aq më të sigurt do të jemi ne.”
Pa hyrë në detaje, Rouhani paralajmëroi se do të paraqesë përpara Asamblesë së Përgjithshme të OKB-së, një plan të ri paqeje. Plani – sipas tij – synon të lerë pas gabimet e të kaluarës dhe të nisë një epoke të re në paqe për Lindjen e Mesme.
Departamenti amerikan i shtetit publikoi në Twitter një video sensibilizuese ku shpjegohen edhe masat e ashpra të Uashingtonit, që synojnë frenimin e regjimit iranian nga aktivitetet nxitëse të terrorizmit. SHBA akuzon Iranin për sulmin ndaj 2 rafinerive saudite të naftës më 14 shtator, pavarësisht se autorësia u mor përsipër nga rebelët jemenitë Huthi.