Meghan Markle dhe Princ Harry pak javë më parë udhëtuan drejt Afrikës së Jugut së bashku me djalin e tyre, Archie. Gjatë turneut dukesha i mahniti të gjithë me stilin e saj, por së fundmi është vënë re një detaj i veçantë në pamjen e Meghan. “Radar Online” ka zbuluar se Dukesha e Sussex është supersticioze, duke qenë se është parë duke mbajtur një varëse për t’u mbrojtur nga syri i keq. Varësja në formën e një dore e njohur si ‘hamsa’ besohet se mban larg shpirtërat e këqinj dhe përdoret në disa kultura të ndryshme në botë.
Sipas “Radar Online” kjo bizhuteri 18-karatëshe që Meghan mban në qafë ka një gur në ngjyrë blu dhe kushton 450 dollarë. Varësja është punuar për t’u mbajtur edhe gjatë përditshmërisë, pasi shkon me çdo lloj stili. Ato janë të përgatitura me dorë në disa dyqane antike në Stamboll, duke përdorur teknika të veçanta të trashëguara brez pas brezi. Kjo nuk është hera e parë që Meghan Markle shfaqet me një simbol të tillë, pasi në dhjetor të vitit të kaluar dukesha u pa duke mbajtur një unazë me të njëjtën shenjë.
