Përfaqësuesja shqiptar e futbollit mbush stadiumet kudo që luan, përveç atyre në vendin tonë. Nëse në “Loro Boriçi” apo “Elbasan Arena” duket e vështirë që të mblidhen tifozë që t’i afrohen kapacitetit maksimal, sa herë që luajnë jashtë, kuqezinjtë po përballen së fundmi me tribuna të mbushura plot.
Pakkush e mendonte se ndeshja mes Francës dhe Shqipërisë do të dhuronte tribuna të mbushura plotësisht në Paris, por një gjë e tillë ndodhi. E njëjta situatë do të jetë ajo me të cilën do të përballet ekipi i drejtuar nga Edi Reja edhe në Stamboll, për ndeshjen kundër përfaqësueses turke.
Federata turke ka bërë të ditur sot nëpërmjet një njoftimi zyrtar se janë shitur brenda pak ditësh të gjitha biletat e impiantit ku do të luhet ndeshja, “Ulker Stadium” i cili ka një kapacitet prej më 47834 vendesh. Ajo falënderoi tifozët për këtë mbështetje të veçantë e me sa duket të paparashikuar, edhe pse në fakt ndeshja mes Turqisë dhe Shqipërisë mund të jetë vendimtare për fatin e kualifikuesve të EURO 2020 për dy skuadrat.