Kreu i Partisë Demokratike në një dalje publike për mediat pas takimit me raportuesit e KiE-s kërkoi sërish zgjedhje të parakohshme parlamentare si rrugë të vetme për ecjen para të vendit.
Ai tha se është koha të merret vendimi i duhur, duke vendosur interesat e vendit para atyre politike. Për këtë ai i kërkoi Partisë Socialiste të reflektojë.
“Të mbahen sa më parë zgjedhje të parakohshme parlamentare. Në Shqipëri janë përvijuar 2 qëndrime, qëndrimi i një shumice absolute, i opozitës që kështu nuk mund të vazhdohet dhe i një pakice absolute që nuk do ndryshim.
Dështimet e njëpasnjëshme të kësaj qeveri i paguajnë shqiptarët. Dështimin me ekonominë, me shëndetësinë, me punësimin. Është koha për të marrë vendimin e duhur për vendin, për të vendosur interesin e vendit mbi interesat politike. nuk mund të vazhdojë më gjatë kështu.
Sot është e rëndësishme se përse nuk zbatohet ligji, pse mbahen në dorë Babani apo Kajmaku i Vorës. Në Shqipëri nuk ka shtet ligjor. Ligji nuk është i barabartë për të gjithë. Një nënë keqtrajtohet, ndërsa pushtetarët e kapur në afera korruptive nuk iu hyn gjemb në këmbë. Kjo situatë duhet të marrë fund.
Jemi të hapur për të gjithë instrumentet që garantojnë ecjen përpara.
PS të reflektojë sa nuk është vonë. Kjo situatë nuk mund të vazhdojë pafund. ndërkohë që ne përgatisim ofertën tonë për të nxjerrë vendin nga kjo krizë, të jeni të sigurt se edhe durimit të popullit po i vjen fund. Ka ardhur koha të ndërtojmë një demokraci ku çdo shqiptar të jetë aksioner”, tha Basha.