Aktor kryesor në filmin “Ndërkombëtarët”, ku rrethohet nga pedagogët e tij në kastin e një produksioni me skenar plot intriga të Ylljet Aliçkës. Eni Shehu thotë se nën lëkurën e Roshit ishte ai vetë dhe natyrisht ky mund të quhet fat, pasi regjisori Pluton Vasi goditi në shenjë me zgjedhjen e tij.
Filmi po shfaqet këtë vjeshtë për publikun në kinematë e Tiranës, ndaj Eni ka shumë për të folur për rolin e romantikut, në filmin ku çmitizohen ambasadorë apo zyrtarë perëndimorë në Shqipëri, apo vendet e Lindjes.
Për jetën mes kinemasë e televizionit, rolin e promotorit që ka marrë përsipër në Festivalin e 58-të të Këngës në RTSH, marrëdhëniet ndërpersonale dhe ato intime, ritulet apo tabutë e një djali me shpirt të lirë, Eni Shehu i zbulon në këtë intervistë për “Panorama Plus”. “Në fakt, skena e seksit në makinë që u bë virale online nuk është e Roshit, por e një tjetër personazhi, Zhilit, që interpretohet nga Hervin Çuli. Megjithatë, e vërtetë është që në film zhvillohet dhe një linjë dashurie mes Roshit dhe një zyrtareje spanjolle, të cilët marrosen pas njëri-tjetrit dhe kanë marrëdhënie edhe më të zjarrtë se ajo e makinës. Këto mbaj mend si momentet më të sikletshme, kur na u desh të xhironim nudo përpara një stafi prej 20 vetësh, që asistonin pas kamerave. Vështirësi nuk besoj, sepse kemi qenë goxha të motivuar nga regjisori Pluton Vasi, ai e kishte të qartë se çfarë po bënte”, thotë Shehu.