Organizatori i ceremonisë hapëse për stadiumin kombëtar ishte Ardit Gjebrea dhe mes artistëve që performuan ishte Juliana Pasha, e cila na dhuroi mjaft emocione me këndimin e himnit.
Por mesa duket një artist mjaft i njohur shqiptar ka pasur dëshirën të jetë në vend të Julianës dhe flasim për Kastriot Tushën. I ftuar në “Procesi Sportiv” ai tha se priste një ftesë nga Ardit Gjebrea për performancën e himnit.
“E prita një ftesë nga Ardit Gjebrea, për të kënduar himnin kombëtar në stadium sepse mora vesh që ai ishte organizatori. Po mesa duket ai nuk e pa të arsyeshme. Gjithsesi edhe Juliana Pasha bëri një performancë të shkëlqyer. Por duhet thënë se himni është diçka emocionuese. Duhet të të motivojë. Kur këndoja himnin më parë, ktheja kokën nga futbollistët. Ndoshta s’dinin të gjitha fjalët, por ama nxirrnin disa zanore. Unë e kisha imagjinuar ndryshe. Me 10 tenorë”, u shpreh tenori shqiptar i cili këndoi live himnin shqiptar më hapjen e emisionit të “Procesit Sportiv”.
Manushi e “qetësoi” disi Kastriotin duke i thënë se do të ketë shumë mundësi të tjera për të kënduar himnin, megjithatë Ilda Bejleri nuk ishte e këtij mendimi: “Kastrioti e ka kënduar gjithnjë himnin dhe mos ta këndojë në përurimin e stadiumit të ri, ka mëse të drejtë”, u shpreh moderatorja.