Pas lajmit të dhënë nga Arditi se “Kënga Magjike” do të ketë një kauzë këtë vit, “Këndoj për të ndërtuar”, një sërë artistësh e kanë përkrahur.
Ardit Gjebrea dhe gjithë artistët pjesëmarrës në ‘Kënga Magjike 2019’ vendosën që të ardhurat e koncertit të këtij viti të shkojnë për ndërtimin e një shtëpie të re në një nga familjet e dëmtuara në Thumanë. Të shumtë kanë qenë ata që e kanë mbështetur këtë nismë, duke shkruar edhe fjalët më të ndjera në këto ditë kaq delikate.
I fundit që ka zgjedhur të shkruajë për këtë moment ka qenë aktori i humorit, Olsi Bylyku, i cili këtë vit konkurron me këngën me titull ‘Ma kthe’.
“E mbas vdekjes ka jetë. Me zemër e shpirt po dhuroj çdo gjë personale e ndihem akoma më mirë që tani mund të ndihmojmë dhe në hapësira të tjera. Me të gjithë të ardhurat e biletave të ‘Këngës Magjike’ do të ndërtojmë shtëpinë e një familje. Mbas këtyre ditëve të errëta, kjo është e vetmja gjë që të bën të performosh i fortë”, ka shkruar Olsi bashkangjitur postit të tij më të fundit në ‘Instagram’.
Kujtojmë se ‘Kënga Magjike’ do të nisë netët live në ditët e para të muajit dhjetor.