Vendet e nismës SHBA-Karta e Adriatikut kanë shprehur solidaritet dhe mbështetje të plotë për Shqipërinë në këto ditë të vështira, pas tërmetit të 26 nëntorit.
Ministrja e Mbrojtjes Olta Xhaçka mikpriti, në cilësinë e kryesueses së kësaj nisme për vitin 2019, përfaqësues të lartë të vendeve pjesëmarrëse. E pranishme ishte edhe Zëvendësasistetja e sekretarit të Mbrojtjes së SHBA për Rusinë, Ukrainën dhe Euroazinë, Laura Cooper.
Ministrja e Mbrojtjes, Olta Xhaçka gjatë fjalës së saj theksoi se për të gjithë, vendin, institucionet, por veçanërisht për Ministrinë e Mbrojtjes, këto kanë qenë ditë dhimbjeje, vështirësie, por edhe të një pune të jashtëzakonshme për menaxhimin e situatës.
Ministrja falënderoi të pranishmit për suportin që i kanë dhënë Shqipërisë, ndërsa theksoi se: “Që kur Shqipëria mori kryesimin e Iniciativës SHBA-Karta e Adriatikut në janar 2019, ne shpallëm si prioritetin tonë më të madh politikën e Dyerve të hapura. Morëm përsipër të punojmë e të përpiqemi me çdo mundësi për ta zgjeruar dhe për ta hapur më tej këtë iniciativë. Sot, besoj më shumë se kurrë se kjo është një domosdoshmëri sepse besoj që pikërisht formate si ky hedhin themelet e bashkëpunimit, fuqizimit të marrëdhënieve dhe krijimit të asaj rrjete lidhjesh, miqësish, kontaktesh, që janë aq të rëndësishme për të garantuar paqen dhe sigurinë në zonën Euro-Atlantike”.
Po ashtu ministrja Xhaçka nënvizoi se, një nga nismat më të rëndësishme të ndërmarra nga Ministria e Mbrojtjes e Shqipërisë gjatë kryesimit është edhe ajo që lidhet me mundësinë e angazhimit në një mision të përbashkët në Irak, në kuadër të NATO-s, ku Shqipëria do të luajnë rolin e vendit drejtues.Zëvendësasistetja e sekretarit të Mbrojtjes së SHBA për Rusinë, Ukrainën dhe Euroazinë Znj. Laura Cooper, teksa shprehu ngushëllimet për jetët e humbura nga ky tërmet vlerësoi miqësinë e fortë ShBA-Shqipëri:
“Shtetet e Shtetet e Bashkuara qëndrojnë afër Shqipërisë me të gjitha vendet e rajonit në këtë situatë të vështirë dhe kjo na sjell në këtë seancë të A-5”.
Ky është takimi i fundit i ministerialit të Mbrojtjes që drejtohet nga Shqipëria, e cila gjatë vitit 2019 pati radhën e kryesimit. Për këtë, znj, Copper vlerësoi rolin e vendit tonë në drejtimin e A-5. “Shqipëria është një shembull i jashtëzakonshëm për të mbështetur operacionet e NATO-s. Siguria që ofroni vazhdon të jetë e rëndësishme, por i përshtatet gjithmonë aspekteve politike dhe taktike të situatave me të cilat ne përballemi”, tha Copper.Vendet anëtare të A-5 janë Shqipëria, Bosnje-Hercegovina, Kroacia , Mali Zi , Maqedonia e Veriut, dhe SHBA, ndërsa vëzhguese Kosova, Sllovenia dhe Serbia. Për vitin 2020 kryesimin e nismës e merr Bosnje – Hercegovina.