Banka e Shqipërisë ka publikuar në Facebook, në rubrikën “Kuriozitetet e së Hënës”, një informacion se kur është sanksionuar pavarësia e këtij institucioni.
Në shkrimin në mediat sociale, Banka e Shqipërisë shkruan se pavarësia është bërë në vitin 1997. “Elementet e reja që solli ky ligj si shprehje e sanksionimit të pavarësisë së Bankës së Shqipërisë qëndrojnë kryesisht tek: mënyra e vendimmarrjes; zgjedhja e Këshillit Mbikëqyrës, zgjedhja e Guvernatorit”, shkruan BSH.
POSTIMI I PLOTË
Më 23 dhjetor 1997, me ligjin nr.8269, “Për Bankën e Shqipërisë” sanksionohet për herë të parë pavarësia e Bankës së Shqipërisë nga çdo pushtet tjetër për realizimin e objektivit kryesor të veprimtarisë së saj, si dhe në ushtrimin e detyrave.
Elementet e reja që solli ky ligj
si shprehje e sanksionimit të pavarësisë së Bankës së Shqipërisë qëndrojnë
kryesisht tek: mënyra e vendimmarrjes; zgjedhja e Këshillit Mbikëqyrës, zgjedhja
e Guvernatorit, afatet e qëndrimit të tij në detyrë; kompetencat e ekzekutivit;
kufizimi i të drejtës për të dhënë kredi direkte për qeverinë përtej një kufiri
të caktuar nga ligji etj.
Me këtë ligj, Banka e Shqipërisë:
përgjigjet para Kuvendit Popullor të Republikës së Shqipërisë; ka si objektiv
kryesor arritjen dhe ruajtjen e stabilitetit të çmimeve; ka të drejtë të
veprojë si agjente fiskale për llogari të Qeverisë së Republikës të Shqipërisë;
ka të drejtën ekskluzive dhe është emetuese e vetme e kartëmonedhës dhe
monedhës kombëtare me kurs ligjor brenda territorit të Republikës së
Shqipërisë.
Fondi i themelimit të Bankës së Shqipërisë është 750 milionë lekë. Ai mund të rritet me propozimin e Bankës së Shqipërisë dhe me miratimin e Ministrisë së Financave. I tërë fondi i themelimit akordohet dhe është në pronësi ekskluzive të Shtetit Shqiptar. Ky fond nuk mund të transferohet ose hipotekohet.