Rruga që lidhte Mirditën me Matin, segmenti Rrëshen-Perlat-Urakë-Zenisht, ndërtuar vitet e fundit, mbeti në mëshirë të fatit.
Cilësia e dobët e punimeve dhe makinat e tonazhit të lartë krijuan shumë shpejt probleme në të gjithë magjistralin. Në trase u hapën gropa të mëdha, inertet zbritën nga skarpatet në rrugë. Kanalet ansore u mbushën me dhera.
Disa herë autoritetet vendore të Matit u ankuan pranë Drejtorisë së Përgjithshme të Rrugëve dhe përgjigja ishte se kjo rrugë nuk ishte marrë në dorëzim.
Banorët u ankuan përsëri pranë Bashkisë së Matit dhe ajo ka ndërhyrë sot me forcat dhe mjetet e saj për ta rehabilituar këtë segment të rëndësishëm rrugor.
“Rruga nga Uraka e deri tek Ura e Matit, duhet të mirëmbahej nga firma që ka kryer punimet, por duket se është lënë në mëshirë të fatit. Në këtë rrugë nuk ka pasur ndërhyrje për pastrimin e kanaleve dhe për mbushjen e gropave. Bashkia Mat po ju përgjigjet ankesave të banorëve për këtë rrugë problematike, një rrugë që nuk është marë në dorëzim nga asnjë institucion për shkak të punimeve pa kriter që i janë bërë kësaj rruge. Bashkia Mat po bën të mundur mbushjen e këtyre gropave, për të lehtësuar lëvizjen e automjeteve në këtë rrugë”, thuhet në një publikim të Bashkisë Mat. /tirananews.al/
