Punonjësit e terreneve sportive pranë Bashkisë Mat prej 13 muajsh nuk paguhen, megjithëse ato cdo ditë mirëmbajnë stadiumin “Liri Ballabani” dhe anksin e tij. Janë shtatë punonjës që kanë trokitur disa herë pranë autoriteteve lokale dhe kanë kërkuar të paguhen për punën e kryer. Vazhdimisht u është thënë se do t’i marrin pagat e prapambetura.
Të gjendur në kushte të vështira ekonomike ata këto ditë bënë lëvizjen e radhës. Iu drejtuan dy inspektorëve të Kontrollit të Lartë të Shtetit që auditojnë Bashkinë e Matit. Pasi i kontaktuan jashtë godinës së pushtetit lokal dhe u bënë prezent shqetësimin e tyre, zyrtarët e KLSH-së u kërkuan që shqetësimin ta paraqesin me shkrim.
Por në momentin kur ata tentuan t’i drejtohen zyrës ku punojnë dy inspektorët e KLSH-së, punonjësit e terreneve sportive nuk janë lejuar nga Policia Bashkiake të hyjnë në godinë. Madje zyrtarë të bashkisë u thanë atyre se: “specialistët e KLSH-së i kemi miq”. Punonjësit u shprehën se do t’i drejtohen Gjykatës për të marrë 13 pagat e prapambetura.