Policia e Durrësit ka reaguar lidhur me zjarrin në servisin në Rrushbull ku thuhet në njoftim se flakët janë izoluar teksa po evakuohen banorët e zonës përreth si dhe asnjë automjet nuk po do të kalojë në rrugën afër tij.
Po ashtu në njoftim thuhet se 5 makina zjarrfikëse janë duke punuar në vendngjarje ndërkohë grupi hetimor po heton për të gjetur shkakun ende të pazbardhur të zjarrit në servis.
NJOFTIMI I POLICISË
Durrës/Informacion paraprak
Më datë 01.02.2020, rreth orës 19:55, në Rrushbull, sa kalon shinat e trenit, ka rënë zjarr në një servis për shitje pjesë këmbimi për automjete.
Në vendngjarje kanë shkuar 5 makina zjarrfikëse ku aktualisht është bërë e mundur izolimi i përhapjes së mëtejshme të flakëve.
Forcat e Ndërhyrjes së Shpejtë të Tiranës, shërbimet e Drejtorisë Vendore të Policisë dhe të Komisariatit të Policisë Durrës po evakuojnë banorët përreth, duke i larguar nga jashtë perimetrit të sigurisë .
Shërbimet e Policisë rrugore të Durrësit kanë marrë masa për devijimin e qarkullimit dhe mos lejimin e kalimit të asnjë automjeti në afërsi të servisit të përfshirë nga flakët.
Në vendngjarje ndodhet dhe grupi hetimor, ku vijon puna për zbardhjen e rrethanave të rënies së zjarrit në këtë servis.