Kryeministri Edi Rama i është përgjigjur pyetjes së një studenti të Universitetit “Aleksandër Xhuvani” në Elbasan, lidhur me Kartën e Studentit dhe koston e transportit publik për studentët. Teksa ka përmendur përfitimet që do të kenë studentet pasi të pajisen me dokumentin, kreu i Qeverisë tha se Karta e Studentit do të bëhet e mundur në vjeshtë.
“E para, Karta e Studentit është një angazhim që për hir të së vërtetës duhet të ishte plotësuar. Nuk është plotësuar, nuk po i hyj arsyes për çfarë nuk ka ndodhur. Gjëja që kemi bërë ne, dhe besoj do bëjmë me kartën, është të hyjmë në rrjetin e Kartës Europiane të Studentët. Ne i kemi filluar bisedimet që me fillimin e vitit të ri. Kemi biseduar me organizatën franceze që është ofruesi i Kartës Evropiane të Studentit. Synojmë që karta e studentit shqiptar të jetë e njohur edhe jashtë vendit. Dhe në ato vende që e njohin, pasi ka një network edhe për vendet që janë jashtë BE, një student shqiptar do të mund të përfitojë edhe në vendet e tjera.
Ndërsa lidhur me atë që do të përfitojnë këtu, kanë nisur besimet me Bashkitë, në mënyrë që Karta të ketë vlerë kudo. Pra karta e një studenti për qytetin e Elbasanit, të vlejë, kudo, edhe për të vizituar Butrintin, për shembull. Bashkia e Tiranës po punon për shembull për të patur marrëveshje edhe me kompanitë private, për ulje 10 %, 20 % për shërbime të caktuara për studentët. Ndërsa sa i takon transportit ndërurban, kjo është diçka që ne po e studiojmë. Pasi brenda qyteteve është më e thjeshtë. Ndaj na duhet kohë për t’i bërë të gjitha këto, dhe do të jetë gati në vjeshtë”, u shpreh kryeministri Rama.