Pas kërcënimit me jetë të drejtorit të përgjithshëm të Burgjeve, Agim Ismaili është arrestuar autori, Muharrem Z. ndërsa është zbardhur edhe mesazhi i kërcënimit. Arrestimi është kryer me vendim të gjykatës së Tiranës. Ai akuzohet për kanosje dhe keqpërdorim të thirrjeve telefonike.
Muharrem Z. dyshohet se është shtyrë nga një grup kriminal për kërcënimin e Agim Ismailit. I arrestuari rezulton i dënuar më parë për shpërndarje drogë në Tiranë.
Ai është identifikuar nëpërmjet numrit të IMEI-t të telefonit, pasi kartën me të cilën ka kërcënuar Ismailin e ka hedhur dhe në të njëjtën telefon ka vendosur numër tjetër të gruas. Gjatë marrjes në pyetje Muharrem Z. nuk ka pranuar autorësinë e krimit. Teksti i mesazhit, që ai akuzohet se i dërgoi drejtorit të Burgjeve është “Të kemi çuar fjalë me njerëz dhe duhet të tërhiqesh, ndryshe ke për ta pësuar keq ti dhe familja jote” thuhej në mesazh.