Policia shqiptare prej ditës së sotme do të ketë makinat e të vërtetës ose thënë ndryshe poligrafët. Për këtë në ministrinë e Brendshme janë certifikuar këtë të martë 5 polifrafët e parë të SHÇBA, të cilat do të marrin në testim dhe kandidatët e Byrosë Kombëtare të Hetimit/
E pranishmë ne ceremoni ishte dhe ambasadorja e SHBA në Tiranë, Yuri Kim e cila tha se kjo do të jetë një tjetër armë në arsenalin e Shqipërisë për të luftuar korrupsionin.
“Jam shumë e kënaqur për të certifikuar suksesin e 5 studentëve. Instruktorja e tyre ka vlerësuar në mënyrë të përsëritur përkushtimin e tyre dhe disiplinën.Është një moment i rëndësishëm në jetën e të diplomuarve por edhe një moment i rëndësishëm në jetën e Shqipërisë. Shqipëria ka ligjin e ri, ligjin e SPAK që kërkon që të gjithë punonjësit e BKH t’i nënshtrohen poligrafit. Ata janë një tjetër armë në arsenalin e Shqipërisë për të luftuar korrupsionin, një tjetër mundësi për të forcuar shtetin ligjor. Jemi këtu për të përuruar edhe njësinë e poligrafit në SHÇBA. Kjo njësi do fillojë të kryejë kontrollin e kandidatëve për drejtimin e BKH”, deklaroi ambasadorja Kim.
Ajo theksoi se SHBA do vazhdojë të asistojnë në këtë detyrë dhe funksione të tjera vendimtare gjatë vitit të ardhshëm. “SHBA-të qëndrojnë me qeverinë shqiptare për të larguar korrupsionin nga sistemi i drejtësisë penale. Dua t’iu them të diplomuarve ‘unë besoj tek ju’ dhe dua t’i them popullit shqiptar ‘unë besoj tek ju’”, tha Kim.