Shoqatat e biznesit kërkojnë një ligj të plotë për sektorin e ushqimit, duke nxjerr në pah problematikat e shumta që ka legjislacioni aktual, të cilat rëndojnë mbi bizneset por edhe konsumatorët. Gjatë dëgjesës në Komisionin e Veprimtarive Prodhuese, përfaqësuesi i Albanian Food Industry, Alban Zusi, thekson se disa nga këto problematika kanë sjellë rritje të çmimit të mishit në vend.
Por kreu i komisionit ka kërkuar që diskutimet të përqendrohen në amendamentet e hartuara nga qeveria për ligjin e ushqimit, që kanë të bëjnë më së shumti me rritjen e sigurisë ushqimore. Edhe në këtë pikë, grupet e interesit kanë rezerva.
Projektligji në fjalë parashikon kalimin e kompetencave për inspektimin e 60% të bizneseve nga Inspektorati Shtetëror Shëndetësor tek AKU, së bashku edhe me kalimin e 120 inspektorëve nga njëri institucion tek tjetri, duke bërë që rreth 15 mijë biznese agro ushqimore të mos kenë më kontrolle të mbivendosura nga disa inspektorate.