Operacioni Forca e Ligjit vijon aksionet në lidhje me goditjen e grupeve kriminale, të cilësuara nga kreu i ekzekutivit si grupi ‘KÇK’ (kap ç’a të kapësh).
Njësia operacionale e policisë Forca e Ligjit ka nisur tanimë punën nga qytetet e mëdha që janë Tirana, Durrësi, Shkodra, Vlora apo Korça, ku dyshohet se janë edhe këto pasuri kriminale që do të gjurmohen nga OFL.
Bëhet fjalë për rreth 60 pasuri që kriminale që dyshohet se janë krijuar nga aktivitete të paligjshme dhe që pritet të sekuestrohen.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
– A. K., banues në Durrës, i dënuar në Gjermani për vepra penale në fushën e narkotikëve;
– B. P., banues në Koplik, Shkodër, i dënuar në Belgjikë për trafik të qenieve njerëzore;
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, i cili brenda jo më shumë se 15 ditësh, duhet të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre. Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit dhe në jo më shumë se 6 muaj Gjykata Speciale duhet të vendosë për konfiskimin përfundimtar të tyre.
Theksojmë se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar të gjithë pranë OFL-së, e cila ka vijuar me procedurat sipas përcaktimit në aktin normativ nr. 1 , të datës 31 janar 2020.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
l.g/ Tirananews.al