Prej dy vitesh banorë të fshatrave të Macukullit e Derjanit në rrethin e Matit ankohen se nuk përfituan dëmshpërblim për tërmetin e 11 gushtit 2018, ndërkohë sipas tyre përfituan padrejtësisht ish zyrtar të Bashkisë Mat dhe ato të njësive administrative.
Banorët e fshatit Barbullej në njësinë administrative Derjan pasi u ankuan në të gjitha institucioneve dhe e mediatizuan shqetësimin e tyre vendosën t’i drejtohen organeve të drejtësisë.
Ato kanë kallzuar në Prokurorinë e Matit ish zyrtarët vendorë se kanë abuzuar me fondet e Emeregjencave Civile duke shpërblyer persona shtëpitë e të cilëve nuk janë dëmtuar nga tërmeti. Madje ish vendorët morën fonde për vete dhe të afërmit e tyre, paçka se nuk banojnë prej dekadash në rrethin e Matit.
Ahmet Rami, banor i fshatit Barbullej thotë se do të shkojë edhe në Prokurori për të kërkuar ndëshkimin e ish zyrtarëve që abuzuan me fondet publike. Ai shton se do të kërkojë kthimin e parave të marra padrejtësisht nga disa banorë të zonës.
“Unë do të kërkoj nga organet e drejtësisë të mundësojë kthimin e parave të përfituara në rrugë të paligjshme dhe me ato para të ndërtohet rruga e fshatit. Janë më shumë se 100 milion lekë të përfituara në rrugë abuzive vetëm në fshatin Barbullej. Me ato lekë ne mund ta shtrojmë rrugën me asfalt. Këtë do ta kërkojmë me këmbëngulje deri në fund”, tha Rami.
