Në kuadër të masave të marra për parandalimin e përhapjes së coronavirusit në vendin tonë, Qeveria ka marrë masa të menjëhershme për të evituar çdo neglizhencë nga ana e qytetarëve, duke vendosur sanksione për personat që nuk i japin vlerësimin e duhur rasteve që paraqesin shqetësime shëndetësore.
Në rast se personat nuk zbatojnë sugjerimet e bëra nga Ministria e Shëndetësisë, ata që vijnë nga vendet e prekura, do të kenë penalitete sipas nenit 35 të ligjit numër 15/2016 për parandalimin dhe luftimin e infeksioneve dhe sëmundjeve infektive.
Gjoba për personat që konstatohen se nuk kanë zbatuar udhëzimet do të jenë deri në 500 mijë lekë.
Kundërvajtje administrative do të konsiderohen mos raportimi i sëmundjet infektive, mosmarrja e masave të përgjithshme dhe të veçanta, refuzimi për vendosjen nën mbikëqyrje shëndetësore, moszbatimi i kalendarit të vaksinimit të detyrueshëm, moskryerja e veprimeve të detyrueshme për përballimin e epidemive dhe moszbatimi i masave të domosdoshme për mbrojtjen nga sëmundjet infektive në kohë.
MASAT PËR PERSONAT QË NUK ZBATOJNË URDHRAT E MINISTRISË
– Mosraportimi i sëmundjeve infektive, dënohet me gjobë, në masën 100 000 lekë
– Mosmarrja e masave të përgjithshme, dënohet me gjobë nga 500 000 lekë ose, në rast përsëritjeje, me mbyllje të veprimtarisë
– Mosmarrja e masave të veçanta, dënohet me gjobë nga 100 000 lekë
– Refuzimi për vendosjen nën mbikëqyrje shëndetësore, dënohet me 5 000 lekë, për personin objekt i mbikëqyrjes shëndetësore, dhe 100 000 lekë për punëdhënësin e personit objekt i mbikëqyrjes shëndetësore
– Moszbatimi i kalendarit të vaksinimit të detyrueshëm dënohen me gjobë nga 100 000 lekë
– Moskryerja e veprimeve të detyrueshme për përballimin e epidemive dënohet me gjobë nga 10 000 lekë deri në 50 000 lekë dhe me mbyllje të veprimtarisë
– Moszbatimi i masave të domosdoshme për mbrojtjen nga sëmundjet infektive në kohë dënohet me gjobë 100 000 lekë