Një lajm i mirë vjen nga Drejtoria e Përgjithshme e Transportit Rrugor. Prej një shkurtit lejet ndërkombëtare 3-vjeçare të drejtimit dhe të qarkullimit do të jenë pa tarifë shtesë.
“Vendimi më i fundit i Drejtorisë së Përgjithshme të Shërbimeve të Transportit Rrugor është që nga data 1 shkurti 2019, do të lëshohen leje drejtimi ndërkombëtare me vlefshmëri 3 vjet, pa rritur tarifën aktuale të lejes. Më parë kjo leje jepej 1-2 vjeçare. Gjithashtu, ky institucion ka vendosur edhe dhënien e lejeve ndërkombëtare të qarkullimit, për të gjitha automjetet, me vlefshmëri 3 vjet, pa rritur tarifën aktuale të lejes 1-vjeçare”, thotë DPSHTRR.
Drejtoria thotë se kjo masë është lehtësim i madh, kursim kohe për ata që paraqiteshin në sportele çdo 1 vit, kursim monetar për qytetarët e subjektet. Masat e fundit të ndërmarra nga Blendi Gonxhe në krye të Drejtorisë së Përgjithshme të Shërbimeve të Transportit Rrugor i kanë dhënë fund mungesës së profesionistëve në sportelet e shërbimeve si dhe kanë forcuar në maksimum kërkesën e llogarisë për të gjithë punonjësit.