Një zyrtar i lartë brazilian, që ka qenë me Presidentin amerikan Donald Trump në një darkë pak ditë më parë, është testuar për Koronavirusin e ri dhe ka dalë pozitiv, raportojnë mediat braziliane.
Fábio Wajngarten, shefi i komunikimit i Presidentit Jair Bolsonaro, ishte në Mar-a-Lago, vendpushimi i zotit Trump në Florida, si pjesë e delegacionit të qeverisë braziliane. Anëtarët e këtij grupi darkuan me Z. Trump të shtunën.
Wajngarten rezultoi pozitiv për virusin pasi u kthye në shtëpi me simptoma të ngjashme me gripin. Ai është në pritje të rezultateve të një testi të dytë për të konfirmuar diagnozën, sipas gazetës Estadão.
Zyra e Z. Bolsonaro nuk iu përgjigj menjëherë kërkesave për koment. Sipas njoftimeve të shtypit, ai dhe disa zyrtarë të lartë që ishin në delegacion po monitorohen për simptoma.
Gjatë fundjavës Z. Wajngarten postoi një fotografi në profilin e tij në Instagram duke pozuar krah për krah me zotin Trump, i cili shfaqet duke buzëqeshur dhe duke mbajtur një kapelë bejsbolli me fjalët “Bëjeni Brazilin të madh sërish”. Nuk është e qartë se kur është bërë fotografia, e cila përfshin edhe nënkryetarin Mike Pence.
Ky i fundit paralajmëroi se Shtetet e Bashkuara do të ketë mijëra raste të tjera me Koronavirus dhe tha se amerikanët që kthehen nga Evropa do të duhet të vetë-karantinohen për 14 ditë.
Ndër personat që ishin në darkë të shtunën me zyrtarin brazilian, ishin edhe vajza e presidentit Trump, Ivanka Trump dhe burri i saj, Jared Kushner, të dy ndihmës të presidentit. Të nesërmen Z. Bolsonaro dhe delegacioni i tij vizituan selinë e Komandës Jugore të Ushtrisë së SHBA në Doral, Fla, ku presidenti brazilian u takua me komandantin Craig Faller.
Që nga e enjtja, Brazili kishte të paktën 73 raste të konfirmuara të Koronavirusit dhe më shumë se 930 raste të dyshuara.