Mbledhja e Shtabit / Nga pakot me ndihma tek shpërndarja e pensioneve, ja masat e marra në Mat, Klos, Bulqizë e Dibër

Sot Prefekti i Qarkut Dibër Nexhbedin Shehu është takuar me 4 kryebashkiakët e Qarkut Dibër si dhe Shtabet e Koordinimit në bashkitë Mat, Klos, Bulqizë e Dibër. Në takimin që zhvilloi në qytetin e Burrelit Prefekti u ndal në zbatimin me korrektësi të vendimeve të Këshillit të Ministrave. Gjatë takimit me kryetarin e Bashkisë Mat Agron Malaj, nënprefektin Hasan Pasha, drejtorin Rajonal të Postës Altin Bojni, komandantin e Repartit Ushtarak Agron Kurti, drejtorin e Mbrojtjes Sociale Nezir Sinani, drejtorin e Shërbimeve Bashkiake Elson Reçi Prefekti kërkoi të hartohen listat e përfituesve të ndihmës ekonomike dhe të dorëzohen brenda ditës pranë institucioneve përkatëse. Sipas tij këto lista do të shërbejnë për shpërndarjen e pakove ushqimore që do të vijnë nga Ministria e Mbrojtjes. Sakaq Prefekti u ndal dhe në vijimin e shpërndajes së pensioneve në çdo banesë. Sipas Prefektit zyrat e gjendjes civile nuk do të shërbejnë për qytetarët por do të jenë në gatishmëri për t’iu përgjigjur nevojave të institucioneve.