Kryeministrat e Greqisë dhe Maqedonisë, Aleksis Tsipras dhe Zoran Zaev nominohen si kandidatura për çmimin Nobel për Paqen për 2019. E në fakt propozimi ka ardhur nga Wided Bouchamaoui, fituese e këtij çmimi në 2015, dhe është mbështetur dhe nga liderët e grupit socialist dhe demokrat në Parlamentin Europian.
Kreu i grupit S&D në PE Udo Bullman thotë se e mbështet këtë iniciativë, pas votës së suksesshme të marrëveshjes së Prespës mes dy vendeve fqinje.
“Me marrëveshjen historike të Prespës, Zoran Zaev dhe Aleksis Tsipras kanë arritur të zgjidhin mosmarrëveshjet e ashpra për emrin mes Shkupit dhe Athinës, që të tjerët dështuan të zgjidhnin për rreth 3 dekada. Kryeministrat e të dy vendeve kanë tejkaluar vizionet e tyre të qarta me kompromisin dhe kurajën që kanë treguar. Ata nuk iu nënshtruan presionit të atyre që janë të lidhura me idetë nacionaliste por vepruan në interesa afatgjatë për të dy vendet e tyre dhe Europën. Në kohën e populizmit, me shumë politikanë që synojnë fitore afatshkurtra në sondazhe, kjo është një provë e madhe e maturitetit politik dhe përgjegjshmërisë”, thotë Bullmann.
Ai vijon se marrëveshja historike i shërben forcimit të europës dhe kontribuon në ruajten e paqes në kontinent. “Në gjykimin tim, kjo arritje e meriton çmimin Nobel për Paqe”, shtoi ai.